Novae Uitgewers is ‘n uitgewersmaatskappy wat in 2018 gestig is deur twee gekwalifiseerde grondslagfase onderwyseresse, met die doel om die liefde vir lees wat hulle self het by kinders te kweek, soos wat hulle leesvaardighede ontwikkel. 

In sy kort bestaan het Novae alreeds heelwat gegroei – die Pippa en Pol-reeks bestaan alreeds uit 60 boeke met bypassende storiekaarte, en boekstelle en omnibusse is ook al op die rakke. Die reeks sal binnekort ook in Engels beskikbaar wees, en ander projekte is aan die ontwikkel om verder uit te brei aan wat Novae aan lesers bied.

Novae se aanlynbiblioteek stel nou hierdie hele avontuurwêreld beskikbaar ter enige tyd en enige plek.

Anel Ubbink is aan bestuur van sake by Novae. Haar passie, kreatiewe denke, en ondervinding as onderwyseres stel haar in staat om elke projek te koester en te kweek tot sukses. Monique Janssens is die mede-direkteur van Novae, en skrywer van die Pippa en Pol reeks. Sy is al vir amper 30 jaar lank ‘n grondslagfase onderwyseres, en van haar grootste passies in die lewe is skryf, taal en lees. Die unieke, moderne en meevoerende reeks boeke  wat Pippa en Pol is, is te danke aan Monique en Anel  se visie, terwyl ons pragtige, kleurvolle illustrasies te danke is aan Ammie Miske – ons illustreerder en kunstenaar wat deur wyle Alex van Houwelingen gementor is. Op haar jong ouderdom is haar illustrasies alreeds gepubliseer in boeke oor die hele wêreld. Michelle van Jaarsveld timmer die taal reg vir Novae in die boeke en enige ander geskrewe stukke, terwyl sy ook vertaal en help met die skryf van kopie vir bemarkingsdoeleindes. Sy het ‘n tale-graad en amper 15 jaar se ondervinding met verskillende rolle wat met taalwerk te doen het. Ons hardwerkende en kreatiewe grafiese ontwerpers is Ilze van Houwelingen en Reuben Kotzé. Ilze spesialiseer in die uitleg van ‘n verskeidenheid van boeke, en het 15 jaar ondervinding, ook by groot uitgewers.  Reuben is ‘n nuwe toevoeging tot die Novae-span, en hy pas goed en vinnig aan by ons styl. Hy is ongelooflik kreatief en sy uitgebreide ondervinding maak hom baie kundig in sy veld.